NACHTRAG! Nikolausbericht 2014

Im Nachgang zur SVG Weihnachtsfeier vom 20.12.2014, hier noch einmal der Bericht vom Nikolaus. Leider haben ja nicht alle den Text live miterleben können. Der Nikolaus hätte sich gerne eine größere Anzahl an SVG Mitgliedern auf der Weihnachtsfeier gewünscht, denn die Erstellung hat viel Zeit gekostet. Für 2015 hofft der Nikolaus auf eine wesentlich höhere Beteiligung! Das ist doch zu schaffen!!!

Übers ganze Joar ham meine Engels-Spione
Sachan zsammdrogn, des is ned ohne,
ham vom Himme runtergschaut,
was si beim SVG so zsamma braud
Ham gschriebn a Menge Gschichtn
de möchad I eich heid berichten

A große Aufgab war in diesem Joahr, der Sportheimbau, zumindest für a boar.
Des is gscheit oganga und kam host gschaut,
war der Rohbau in d'Häh naufbaut.

Des war a net schwar, denn de Arbat de war vergem
vom Mauern bis zum Dachstui aufhem.
Aber dann mim Ausbau ging de Eigenleistung o,
do hot der Joker woi des meiste do.
Elektro und Lüftungsplanung, Montage a no selber gmacht,
Joker ! Du wearst von mir mit am extra Lob bedacht.

Aus dem Rest von dem Bau is dann a Zweikampf worn,
den ham si da Ex 1. und 2. Vorstand auserkorn.
Der 1. war Chef vo dem Hochbauteam, der 2. ois Tiefbauboss zumeist in irgend am Grobn drin.
So ham de zwoa Teams eanan Kampf austrong,
immer drauf gschaut, wer is im Terminrenna grod vorn.

Dem Goier seine Helfer warn zwar do net so vui Der Demmel Jagg und der Gschlößl warn de Hauptdarsteller in dem Spui.
Der Gregor hot do meist mehr Helfer ghabt, bsonders mit de Fuaßballer hod des recht guad klappt.
Drum war des Hochbauteam in dem Renna a zumeist vorn,
der Goier hod scho resigniert, denkt' der Kampf is verlorn'
Aussichtlos san de Tiefbauer im Rückstand gleng, aber wia der Hochbauchef is a Woch an der Algarve gleng,
hot der Gschlößl Franz a glei Urlaub gmacht,
der Goier und der Jagg dazua, des war ja glacht.
Dem Greg wern mas zoang, des war ja schee,
während dem sein Urlaub derns na in Führung geh!

Des hätt a klappt, ganz ohne Zweife,
aber wia er's hoilt so wui, der Deife,
ham de Tiefbauer so etliche Meter umasunst ausbuddeld,
a Leitung gsuacht, wo's war vermutet aber net war
..... und a net zum finna, an Grom hams wieder zuaschüttn kinna.

Sie ham hoilt etlichs zwoamoi gmacht,
und so manch Stund vergebns verbracht.
Fertig worn sans z'guaterletzt a und im Termin,
genauso wia des Hochbauteam.

A Unentschieden war des, ... oa Punkt für an jeden, den zwoaten Punkt tuats jetzt für den Sieger von dem Stechen geben.

Ich bitt de zwoa Spielführer moi zu mir heraus, na machma jetzt den Sieger des Baurennens aus.

>>>> (Hans und Gregor kommen vor zum Nikolaus)

na schau'ma moi, obd's Ihr beherrschts den Bauleiterjob,
ich frog Eich jetzt glei a moi ob.

Hochbauchef jetz sog mia moi de Hächn von de Innentürn, na wia is de Zoi ?

>>>> (Gregor antwortet)

Ja super sog i, du beherrschst dei Fach
Schauma moi wias is mim Tiefbau seim Sach.
Tiefbauchef Hans, von Dir mecht i wissen, de Einbautiefe der 1. Klärgruabn, aber nix wird bschissn!

>>>>> (auch Hans antwortet richtig)

Beide setzen, Note Eins mit Stern, soiche Bauleiter hod de Weild gern,
Do kon der SVG ruhig weiterbaun,
dene Zwoa kon ma vertraun.
Ihr derts olle Zwoa den Zusatzpunkt hom,
seid's beide Sieger, und beide zum Lobn

>>>> (Hans und Gregor setzen sich)

Mit an so am großen Sportlerheim
ko ma guad an neia Vorstand weiln
In dem großen Saal
war im November Wahl

An scheena Gruaß und Dank von oben,
und im Namen von alle Mitglieder, dearf i den oidn Vorstand loben!

Jetzat setzt da Martin Schlicht
fort, de guade Gschicht
unterstützt vom Mathias und vom Hermann,
do muaß ma um den Verein koane Soagn ham.

79 gültige Stimmen warn einig bei der Wahl,
doch für oan war des a richtige Qual
Ois echter Demokrat
er gern mitwailn dad.

Da Florian Werter ois Gemeinderat und Sportreferent
is an der Seitn gsessen, ganz dezent.
Sei Hand blieb unten, sie hod scho zuckt,
midstimma... des häd'n gjuckt.
Heid is a ned do, des is schod,
weil er nämli Ualaub hod.
Bei der nächsten SVG-Wahl hod sei Leiden a End,
er kriagt vo mia demnachst an Aufnahmeantrag gschenkt.
Wenn an guad ausfuilt und duard'n na unterschreibm,
dann konn a neban weiln, sogar no Sport betreibn

Ja sportlich san de zwoa Exvorständ a no voi drin, Bei der kloansten aber aktivsten Abteilung, dem Radl Roaser Team

Da Goiler fahrd ind Arbad mitm Radl täglich,
andre nema do as Auto, des is kläglich.
Aufm Weg driff'da Birgit und hoit o,
dass er mit Ihr ratschn ko.
Und wia a vazeilt vo sich und dera Weild
.... is er auf was kemma,
und sogt, er hod im Bett a Überlänga.

.....a Überläng im Bett? .....
d'Birgit hod gschaut, ganz nett,
wos des zu bedeitn hätt.
Irgendwos waaar z'kurz und des andre z'lang,
woids as wissn? ... dann müasstsn frogn

Der Goier Hans is bei jedem Ausflug dabei,
fohrt mit de Spezln in de Tschechische Hauptstadt nei.

3 Tog hams braucht bis in des schöne Prag, san gfohrn in da Sunn und a beim Regn, ganz ohne Frag.
In oaner kloana Ortschaft, glei hinter der Grenz is gwen,
do is aber sogor de Roaser der Regen z'heftig gwen.

San drum in a versiffte Sportsbar nei,
der Wirt schenkt glei a Rundn ei,
des Bier war billig, gor net zum glam, drum keman hoilt a boar mera Runden zam.

D' Sunn hat scho lang wieder glacht über der Tschechei,
do schenkt der Wirt no ollwei ei.
Ja de letzten 5 Runden hod der Wirt bei Sonnaschein eigschenkt,
beim Weiterfohrn hods dafür na wieder grengt.

Am 3. Tog war dann nach 420 Kilometer Prag erreicht,
blos as' Hotel z'finnna war trotz Navi net leicht.
De letzten boar hundert Meter ham de Spezialisten eana Radl trong,
de Treppen warn so hoch, do konntn ned amoi de Roaser fohrn.

De Heimfahrt am Montag war dann sicherheitshalber mit Bus und Bahn,
do ko ma am leichtesten Windschatten fahrn.
Man muass net ollwei auf de Strass aufbassen,
sondern ko si in Ruhe mit'm Tringa befassen.
Zumindest wenn der Bierautomat im Bus drin funktioniert,
wenn net, wias do war, na bist hoilt ausgschmiert.

De Radlroaser keman ganz durstig in Nürnberg o,
do warn dann zum Glück a boar Wirtschaftn do.
Um de Zeit bis zum Anschlusszug zu vertreibn,
wollten de Radler do sitzen bleiben.

Den erstn Zug nach Rohrbach hams drum knapp verpasst,
a der zwoate, ... der is abgerast,
Obs dann der 3. 4. oder 5. war,
oder der Lumpensammler gar,
is net bekannt, des woaß net amoi I
obwoi i fast allwissend bi.

Hoam kemma sans jedoch, des steht fest,
wos si ja scho da dro erkenna lässt,
dass einige der Teilnehmer heit unter uns san,
do vorn, do hocken de olle zam.

Radlroaser und Hoamgeh, des is eh so a Gschicht,
denn sehr oft gelingt des Ganze nicht.
Bei der Abschlussfeier im Sportheim drom,
woit de Martina moi an gscheitn Umsatz hom.
Hod drum de Vereinsheimuhr manipuliert,
hod lang dauert, na hod's der erste kapiert.

Auf der Uhr is ollwei dreiviertl gwen, und jeder woilt zur vollen Stund erst gehn.
De letzten drei, na wer war des woi ? der Rainer, der Hermann und der Hans auf jeden Foil,
hättens dann wirklich doch boild no hinkriagt,
dass de Uhr mit 3⁄4 Neine ned liagd.
Zum Ausgleich hot aber de Martina den Rainer und Hans hoambrocht,
do wars lang scho Tog und nimma Nocht.
Also Radlerfrauen, kinnts beruhigt sein, seis no so spat, d'Martina bringt de Manna heim.

Ja so vui guade sacha
ko ma in dem Verein schee macha:
mit'm Lauftreff und der Hannelore
naus in Woid, des is für vui des oanzig ware

Im Hega Foarst stänga de Bahm dicht an dicht,
es schaugt ois gleich aus, ma glaubt es nicht.
Do war scho mancher Läufer so verwirrt,
und hod si glatt im Woid verirrt.

Bei de neia in da Gruppe
basst d'Hannelore auf wia a Glucke
da soill jaaah nix bassiern,
aba de oidn Hasn im Verein, de ko ma scho moi valiern.

D'Waltraud war oa moi valoarn,
a de Sonja hod gmoant sie kimmd nimma hoam,
da Pedro is mit seine Lauf10er mehra grennt,
wei a gmoant hat, dass er die Streckn kennt,
aba wer jetzt denkt, de Profis passiert des ned,
na frogts d'Hannelore, de woas vo was i red.

Im Herbst und Winta,
es weard früa finsta,
Do laffas obnds dann nimma im Woid,
sondern vo Woiza auf Geratzshaun, do is na meistens schee koid.
A Streckn zum varreckn,
grod hie und grod retour
so langweilig und fad, warum macht's des nur?

I ko eich nur empfehlen, dengst's liaba zruck an de scheene Zeit,
wods ihr bei Veranstaltungen überoi umanand grennd seid
Denn wer was seng wui von dera Weid,
spendiead si neban Beidrog, seiba a bissal Geid
und fahrd mit seim Verein
in fremde Städt und Länder rein.

Fast wia Urlaub san de Lauf-Reisen,
ma muas hoid a boar Mäta extra kreisen,
kaum bist 10, 21 oder 42 Kilomäta grennt,
kriagst scho a Medallie um an Hois rumghengt

Nach Wien hods gschafft a ganze Gruppe
ohne Störung, ned so, wia letzts Joar oana aus der Fuassboi-Truppe.
Gedobt mit Wiener Schnitzel und a Tortn vom Sacher,
konnst im Ziel immer no guad lacha

Und Reykjavik....
auweh zwick!
Bis nach Island san sechse greist!
Ham sie sogar no a Rundreise g'leist
Für'n August hod eana jeda empfohln,
dead's eich warme Sachan holn,
auf dera Insel waars a soo koid,
wia im Winta bei uns im Woid.
Aba wenn a Vulkan leicht spuckt,
spuit des Wedda scho verruckt.
Glaffa sans im kurzen Gwand,
durchs Ziel ... fast Hand in Hand.

Bei der allergrößten von de Reisen,
die der SVG jemoils konn aufweisen
hod der Ralf glei über 30 Leid,
durch super Organisation vom Stress befreit.

Is nach Palma gflogn mit der ganzen Schar,
hod's a wieda guad zruckbracht, des is wahr!
Vorm Abflug nach Malle,
hams in dera Wartehalle
no ganz schee fleißig Sekt genossen,
und mitm Korkn fast an Sprinkler ro'gschossn
Dann waars vorbeigwen mit der Lafferei,
stattdessen a Verhör bei der Polizei.

Auf dera Insel hams ghofft auf milde Temperaturen,
doch davo weit und breit koane Spuren,
Im Oktober! greislig hoaß war's wiad Sau,
do wurd's manchen beim renna flau,
bei 30 Grod durch vui Getränke unterstützt,
de hams glei wieder ausse gschwitzt.

Des Wasser und Cola leicht
wurd eana vom Radl runtergreicht.
Von der Kirsten und Michaela, sie warn beide valetzt
und ham dafür de Läufer mitm Radl recht ghetzt

Da Michaela faids am Knia,
wenn ma's frogt, sie woaß a ned wia.
Und bei der Kirsten war's beschissen,
am letzten Dog beim Training hod sas gschmissen
...und is pfeigrod, a Bandl grissen.
Aus wars mit der Marathon-Rennerei,
aber.... dann is hoid 2015 wieda dabei

Spada dann im Reisebericht
hod der Ralph niedergschriebn, de ganze Gschicht.
Auf'd Homepage no a Buidl nei,
na is im Himme losganga, de Beschwererei.
„Wenn Jesus übas Wassa gähd, des am Lauftreff ned zuastähd!"
Mekkert mei Seniorchef, „des macht ma nicht,
a Foto mit alle Läufer aufgreiht auf dera Wasserschicht!"

So, des warn de Bericht vom fernen Lauf,
aber in da Hoamad ward's Ihr a guad drauf.

Ingolstadt ghörd einfach dazua,
des lasst die SVGler gar koa Ruah.
oamoi im Joahr den Halbmarathon,
es is hoid einfach Tradition.
Zwoa Staffeln Kinder und 34 Läufer an der Zahl,
für de war der Rundkurs fast koa Qual.

Oidedding, aah des kenn ma schon,
is mittlerweile ... Tradition.
Do laffst mit himmlischen Segen
nach 21 Kilomäta dem Ziel entgegen
17 Läufer fanden des schee,
andere sechse war'n am Tegernsee.

Letzts Joar am Simssee war der Bernd no alloa
beim heirigen Event da warens dann schoh zwoa.
De junge Angelina hodn unterstützt,
do is da oid Bernd glei fui schneia gflitzt.

Von Minga .....
do konn i glei zwoa Gschichtn bringa:

Ois oanziger vom ganzen Läuferhauffa
is da Neumeier Miche an Marathon glaffa.
Er hod's as erste moi probiert,
war fast a bisse irritiert,
hod no kriagt am Schluß an Krampf,
mei war des ein harter Kampf.

und des zwoate wo i eich vo Minga bericht,
is a reine Weibergschicht:

Beim Womans Run geht's ned ums Laffa,
des is vui mehra so wia .... „eikaffa".
Do wern lila T-shirts ausprobiert,
fast scho de scheenste dann gekürt...
mit 30 Euro Startgebühr,
da kriagn de Fraun scho wos dafür!
mehrere Cremes für'd Fiaß, as Gsicht und Falten,
a fürn Hintern und andere Spalten,
Kondome für de Junga und de Alten,
Tabletten für die Balz,
dazua no Badesalz.
Des is ois im Starter-Beutl drin,
für die schöne Läuferin!

Doch jetzt gnua von dene Wettkampfgschichten,
vom ganz normalen Lauftreff gibt's a no was zu berichten:

de Hannelore war vom Womans Run,
no ganz im lila T-Shirt Wahn,
hod gmoant, dass ma de greana Dressen
scheh langsam ko vagessen.
A neie Farb muass her,
rosa oder pink, des war ned schwer.

spaada ham a boar von dene Damen
mit zwoa Läufer koa Erbarmen
ham's an Ralf und Peter oprobiert,
wia des pinke Shirt mitm Woid harmoniad

glücklich dreigschaut ham de zwoa nicht,
ma siegts auf da Homepage an eanam Gsicht
ma konns zwar von na Wuidsau unterscheiden,
aber da Männerstolz muass ganz schee leiden.
Sodass zum Schluss,
bevors no gibt an Vadruss,
de Hannelore hod entschieden,
sie bleibt bei grün für ihre Lieben.

Da Lauf10 war voll wie eh und je,
trainiert hams fleißig und schee
In Woiza dann beim Abschlußlauf,
gab's für de Neiling Erfolg zu Hauff.

Für vui war des Lauf10-Ergebnis
a so a tolles Lauferlebnis
ham glei an Aufnahmeantrag unterschriebn,
und san bei da Hannelore im Lauftreff bliebn

So wead da Lauftreff imma mehra,
a für'n Gregor beginnt a neie Ära.

Letzts Joar hob i'n no gschimpft,
dass er zweng rennt .... der Präsident,
doch jetzad, von Amt und Würden befreit
mischt er si öfters am Samstag unter d'Leid
Jetzt kema zur Abteilung Taekwondo,
wos hod si bei dene in dem Joar so do?

Da Gschlößl Franz, da Abteilungsleiter
schaugt jetzt froh und heiter
hods endlich bakt und lacht:
er hod an schwarzn Gürtl gmacht.
Noch fast 30 Joahr Blogerei,
is a jetzt mit'm 1.DAN dabei.

No mehra schwarze Gürtl hod´s des Joahr bei dene gem,
in Rohr miaßn de Leid jetzt echt obacht gem.
De Seidlers, ham nämlich in oam Hausstand vereint
glei 9 schwarze Gürtl, wenn uns des ned gfreid.
A Einbrecher der wo se da eine draut
hod hoffentlich scho fürs Jenseits vorbaut

Da Alois duad a no gern Fußboi spuin
was an sich a no koa Problem kunt gem.
Allerdings hod er se heier mim gegnerischen Torwart oglegt,
der Zusammenprall hod´n glei vom Platz owe gfegt.

Da Notarzt - a Hubschrauber - des volle Programm
nach 3 ganze Monat war er wieda daham.
Liaba Alois lass dir dees von mir gsogt sei ,
mit dem Teakwondo gibt´s koa so a Schererei

Von da Anita hob i gheard, sie kons kam dawarten
im Süden, im Ruhestand in der Sonne zu braten
In Pension mecht sie mim Jürgen de Welt oschaun
und ganz schnell von dahoam obhaun.
An Wohnwagn hods dazua hod a scho kaft,
hofma, dass da Jürgen boid in'd Alterteilzeit schafft

Da bleim no da Bene und die Gerlinde auf meiner Listn
De ma heid a no erwähnen müsstn
In d'Rente mächadn de zwoa geh
vo der Taekwondo Arbad, des find ma ned schee

Fürn Liegestui bis ans Lebensende
is doch no z'früah, des is koa schens Ende
Sie san fit, agil und schaun super aus,
drum lass ma's aus der Aufgab ned raus

Liebe Gerlinde, lieber Bene: de braucha eich no
Hängds einfach no a boar Joahr dro

Irgendwer feid ma no?..... ahh jetzad kemma zu de Fuaßballer

Bei der letztn Feier ward's ihr weit vorn dro,
heia ham eich meine Engal a bisse weida nach hintn do

As Johr 2014 war no ned allzu oid, scho dengan Fuaßballer wieder an Sport, so g'heard ses hoid.

Zum Spinning ins Fitness noch Woiza sans gfohrn, i verstäh äh ned wos ma dafo ko hom. A Stund lang aufm Fleck in Pedale neidren, und sich koan Meter weit ned bewegn.

Glei bei der oller ersten Stund is gwen, ois der Schuaster Alex tritt danem, und grätscht a so a Radl raus, ois gangs um unser aller überlebn.

Des Radl foid, wia sois a anders sei, direkt in so an Spiagl nei. Der Spiagl nimmt des ziemlich krumm, und derbricht mit oam drum kawum.
Und mit zwoa Roina Tesakrepp, hams an Spiagl wieda zammabeppt.

Wenns drum geht irgendwos kaputt zum macha, do lassts der Fussili a ganz schee gracha. Mim Kofferraumdeckel hod der sei Handy zamghaut, naa Stefan, für sowos san die Dinger einfach ned baut.

Der Stefan duad a immer kund: „0,3 Promille baut mein Körper ab, und des zu jeder Stund! „ Der Dave hots erm schon oft versuacht zu erklärn, nur leider mächt er sowas einfach ned hern.
Mei, wos segn denn meine müadn Augn, an nein Spielertrainer hams a, az Gerazaun. Wuidmoser hams gsagt duad der hoassen, und bei der Einstandsfeier hod as a gleich richtig gracha lassen.
Ab zwoa in da Nacht war der a Sportparkbankschläfer, meines Wissens ned der erste dieser Art, aber der, ders am längsten auf dem harten Ding ausghoitn hat. Respekt Wuide, des muss i sogn,
du passt scho her do, ganz ohne Frogn! Das ma selbst a Bedienung aufm Geibodnfest no in Erstauna versetzen kann, des hod der Haages Stefan bewiesen, ganz ohne Schmarrn. Hod der Stefan doch glatt drei Gnel mit Soss bei ihrer o´gschafft, und steits eich vor, sie hods sogor in oan Della nei bracht.

Der Spiße Kevin hods am Dienstag a ned immer schee, hod er doch ins Training die weideste Anreisee. Doch kummd er meistens immer ned pünktlich, er oft in an ganz diafn Schlaf foin duad, und des sekündlich.
So kimmt der Kevin vo vier Training zwoa moi z'schbad, host scho recht Kev, liaba ausgeruahd,
ois a nur oamoi a bisse malaad.

An am Sonndog, kurz vorm Treffpunkt zum Spui is gwen, der Huber Max .... er ward noch nicht gesehn. Der Drexler Flo er ruafd'n schneil oh, wo er denn bleibt, sie ham nämlich nimma recht fui Zeit. Der Max is aber ganz entspannt, „i bin glei do,
derz eich nur ned o!"
Bei de Mädls is a immer gscheit wos los, manchmoi moanst, de wern nier ned groß.
Beim letztn Haomspui gega Minga,
... da Gegna konnt übrigens ned gwinna..., schreit de Alena auf oamoi in oana Tua an Norbert irgendwos unverständlichs zua.
Der Norbert denkt sich, wos is do los,
ko's nimma, muass sie raus, is ebba aus?

Er sigd scho sei Taktik kriseln Na Norbert, ganz oafach, sie muaß bloß ... Und dass de Mädls beim Feiern koana dahoit, des hams bewiesen im Trainingslager, im Boarischen Woid.
Nach ana langa Volksfest- und Partynacht, stäht am Dog drauf a Training o, des waar doch glacht.
Und trotz allem Bitten und Betteln, sie ham eam de Ohrn voi gsunga der Norbert ist hart bliem und hods zum Training rausgwunga. Dorauf hod si koane der Damen gfreid, sondern mehra den letzten Obnd bereid.

So ihr liaben Leit,
I hoff Ihr habt's as ned bereid,
dass i a so lang bleib.

S'war a Menge zum Verzeiln,
aber meine Engal hams a so weiln.

Bleibts sportlich, hoits eich fit
schiasts vui Tore, machts vui Schritt,
für die Kämpfer, an guadn Tritt,
tanzts a Rumba, werkelts eich ab bei Zumba,
tritts nei in de Pedale, (...und vergessts koane Lokale)
bauts weida eier Sportheim
und vor allem ... dearz ma gsund bleim

nachad bin i a scho wieda davo,
bis nächsts Johr, eia guada oida Nikolo!